Stormsterk geloofVoorbeeld

Groter dinge wag!

Nadat Jesus en sy dissipels die storm op die see getrotseer het, het hulle aan die kant van Gádara voet aan wal gesit. Daar het Jesus 'n duiwelbesetene bevry. Die heerlikheid van die oomblik was beslis groter as die storm wat hulle 'n rukkie vantevore beleef het. Die getuienis van hierdie man se bevryding was meer oorweldigend as die stormsee se golwe.

Groter dinge wag! Wanneer jy 'n stormsterk geloof het sal dit 'n suiwer karakter in jou tot stand bring; soos wanneer goud deur vuur gelouter word. 'n Stormsterk geloof laat jou besef dat jou afhanklikheid van God nie 'n swakheid is nie, maar 'n vasberade oortuiging daarvan is dat die Here by magte is om te doen ver bo wat jy kan bid of dink. Met 'n stormsterk geloof leef jy in die verwagting van 'n kragtige toekomstige getuienis. Nie net 'n getuienis van hoe die Here die storm stilgemaak het nie, maar ook van 'n radikale deurbraak wat Hy bewerkstellig het. Ja, waarlik, groter dinge wag.

Gebed

Here, dankie dat daar groter dinge wag. Sal U my met 'n stormsterk geloof ondersteun sodat ek die heerlikheid van u werke kan aanskou. Amen.