Jy is ’n Kosbare Dogter Van Die Koning Voorbeeld

Jy kan volkome vertrou

Jy is gehoorsaam aan God, want jy glo Hy het jou lief en het ’n beter plan vir jou lewe as wat jy self ooit kan uitdink. Liefde en vertroue gaan hand aan hand. Kan jy iemand vertrou wat jy nie liefhet nie? Kan jy lief wees vir iemand wat jy nie vertrou nie? Nee, liefde en vertroue moet saamgaan. Toe jy Jesus pas ontmoet het, het jy Hom op ’n baie basiese vlak liefgehad en vertrou. Hoe dieper jou verhouding met Hom geword het, hoe meer het jou liefde en vertroue gegroei.

Die kernwoord van die vers is “volle”. Jy moet met volle vertroue na God toe gaan. Dit beteken geen huiwering, geen twyfel, geen “ek sal dit self hanteer”-planne nie. Vertrou Hom met absoluut alles, want jy weet sy hulp is altyd daar vir jou. Jy vertrou omdat jy weet Hy het jou lief. Hy sorg vir jou omdat Hy jou liefhet.

Moet nooit bang wees om ’n onbekende toekoms aan ’n bekende God toe te vertrou nie. (Corrie ten Boom)