Rick Warren se Daaglikse OordenkingsVoorbeeld

Moenie toelaat dat beperkings jou visie beperk nie

God gebruik nie net jou gawes om jou lotsbestemming te vervul nie, maar ook jou beperkings.

Dink aan koningin Ester: Sy het verskeie beperkings gehad wat haar perfek gemaak het vir die rol waarin God haar wou gebruik. Sy was 'n weeskind wat deur Mordegai aangeneem is, sy was deel van 'n minderheidsgroep, 'n Jodin wat in die land Persië gewoon het, en sy was ongetroud.

God het al hierdie beperkings gebruik, asook die gawes van haar skoonheid, verstand en persoonlikheid om haar lotsbestemming te vervul. Soms kan iets soos 'n ramp lyk, maar eintlik is dit deel van 'n groter plan. Jou lotsbestemming sal egter nooit vervul word as jy jouself sit en jammer kry nie.

Ester kon gesê het: "As ek maar net nie gekies is nie, as ek tog net nie 'n Jodin was nie, as ek liewer iemand anders was." Baie mense doen dit. Hulle lewe in gegriefdheid, hulle kyk na ander mense en sê: "Dit moet seker lekker wees om hulle te wees."

Met so 'n houding sal jy nooit jou lotsbestemming vervul nie. Jy moet besef dat die onaangename struikelblokke in jou lewe dalk Godgegewe geleenthede mag wees om 'n verskil te maak.

Jy is dalk nou in 'n situasie waarin alles verkeerd loop en jy kan nie daaruit kom nie. Maar God weet. Niks in jou lewe gebeur toevallig nie. God kan die plesiere en die pyne, die geleenthede en struikelblokke, alles gebruik. Daar is niks in jou lewe wat God nie ten goede kan gebruik nie, jy moet dit net aan Hom oorgee en Hom dan vertrou.