Verlosser - Die Belofte VervulVoorbeeld

Lees: Jesaja 7:14-17, Jesaja 40:1-2

SOAP: Jesaja 7:14

Sedert sonde die wêreld binnegedring het, het ons 'n desperate behoefte aan 'n Messias. Daar is niks wat ons kan doen om onsself te red nie. Die bloed van diereoffers in die Ou Testament het slegs die sonde bedek. Ons het die Perfekte Lam nodig gehad, die Verlosser, die Messias, om sy Bloed te stort om ons sondes volkome weg te neem.

Daar is soveel liefde in vandag se verse! Jesaja het geweet hoe dit was om God se mense te waarsku en te onderrig; maar die Here wou ook hê dat sy mense sy troos moes ontvang. God se opdrag aan Jesaja was om sy volk te troos. Hy gebruik teer, liefdevolle woorde, woorde wat aankondig dat hulle ongeregtighede vergewe word, dat hulle nie meer hoef te veg om skoon te wees nie. Die volk was op die punt om deur die Assiriërs in ballingskap weggeneem te word en hulle het al die troos nodig gehad wat God kon bied.

Die maagd sou swanger word en 'n kind baar. Die Verlosser sou gebore word. Die sonde sou vergewe word. My oë vul met trane wanneer ek hierdie verse lees. As ek terugkyk op my lewe sonder Jesus, kan ek nie glo dat God besluit het om my lief te hê nie. Ek kan nie glo dat Jesus vir iemand soos ek gesterf het, dat Hy my talle sondes gedra het nie. Ek verdien dit nie. En tog sou die Messias gebore word om vir my - en jou! - die lewe te gee.

Liewe Here, U het my so lief gehad dat U u enigste Seun gestuur het om die prys vir my sondes te betaal. My hart is vol lof en dankbaarheid. Dit gaan my verstand te bowe om te sien hoe Jesus die profesieë wat so lank voor sy geboorte aan die volk vertel is, vervul het. Dankie dat U my siel gered het en vir my geloof gee deur u magtige Woord. Amen.

Mini uitdaging: Kom ons maak Jesus doelbewus die middelpunt van ons Kersfees-vieringe deur versierings te maak wat die naam van Jesus insluit. Is jy reg vir 'n moeiliker uitdaging? Neem tyd om die aantal profesieë wat deur Jesus se geboorte vervul is, na te vors.