Verlosser - Die Belofte Vervul

Bybeldagboek

Inleiding: 


Kersfees is op hande! Is jy gereed vir hierdie besige seisoen? Die vakansietyd is gepak met inkopies, musiek, ligte, versierings, skoolopvoerings en elle lange ‘te doen’-lysies. Ons moet dink aan bymekaarkomgeleenthede, geskenke, spyskaarte. Daar is kaartjies wat gepos moet word, e-posse wat getik moet word, foto's wat geneem moet word, familie en vriende wat besoek moet word. Ons kyk na ons skedules en raak paniekbevange, omdat ons weet dat dit onmoontlik is om al die dinge op ons lysies te doen.


Te midde van ons baie besige dae is dit maklik om te vergeet waaroor Kersfees regtig gaan: Ons vier Jesus. Ons vier sy koms.


Die wêreld het op sy kop gedraai toe Jesus gebore is. Al die Ou Testamentiese profesieë oor die koms van die lang verwagte Messias het in vervulling gegaan met die geboorte van Jesus. Die Verlosser het vlees geword. Jesus het Homself geïnkarneer om ons lewe te gee, sodat ons sondes vergewe kan word en ons die geleentheid kan hê om vrygemaak te word van die oordeel wat ons verdien.


Die verhaal van Kersfees is vol van gewone mense wat buitengewone omstandighede ervaar het. Ons sien hoe engele met Sagaria, Maria en Josef praat. Engelesang vul die nag met lof, terwyl herders na hul kuddes omsien. 'n Helder ster lei die wyse manne na Betlehem. Burgerlike owerhede word deur God gebruik as deel van sy ewige plan. Ons sien wonderwerke. Die wonderwerk van Johannes die Doper se moeder, Elisabet, wat op haar oudag swanger raak. En, bo dit alles, die wonderwerk van die inkarnasie van Christus. 'n Jong maagd skenk geboorte aan die tweede persoon in die Drie-eenheid.


Toe sê die engel vir hulle: “Moenie bang wees nie, want kyk, ek bring vir julle 'n goeie tyding van groot blydskap wat vir die hele volk bestem is. Vandag is daar vir julle in die stad van Dawid die Verlosser gebore, Christus die Here!” - Lukas 2:10-11


Ons vier die goeie tyding van Jesus se geboorte. Dis 'n tyding van groot blydskap vir alle mense, in drie baie spesiale opsigte: 


Jesus is die Verlosser wat ons van sonde en dood bevry. (Matteus 1:21)


Hy is die menslike Christus, die Messias wat die wet en die profete vervul het, en daarop wys dat God getrou is. (Matteus 5:17)


Hy is die Here wat ons wêreld betree het in 'n onverdeelbare, ewige band van God en mens; Emmanuel, God met ons. (Matteus 1:23)


Soos ons die seisoen, die gesellighede, die geskenke, die tyd saam met vriende en familie geniet, kom ons maak Kersfees 'n viering van sy koms!