Matalikilo 1
BB03
1
Lesa mbwaakalenga shintu shoonse
1Kumatalikilo Lesa wakalenga liculu acishi ca panshi. 2Ono cishi taaku mbocakalingaawo ceebo temwakalinga shintu. Kwakalingabo munshinshe peculu lya maanshi aanji. Mushimu wakwe Lesa wakalinga kweendeendabo peculu lya maanshi. 3Mpeeke Lesa wakaamba ayi, “Akube mumuni.” Lyalo mumuni wakabaako. 4Lesa wakabona kwaamba ayi mumuni ngubotu, lyalo wakapansaanya mumuni amunshinshe. 5Mpeeke Lesa wakatumba mumuni ayi, “Malumwi,” awalo munshinshe ayi, “Mashiku.” Lyalo kwakaba macolesha amacuunsa, ubu bwakaba mbushiku butaanshi.
6 Ono Lesa wakaamba ayi, “Akube musena ufongomene kwiculu kwaamba ayi upansaanye maanshi.” 7Aboobo Lesa wakalenga musena ufongomene uyo akupansaanya maanshi ayo apanshi lya nguwo alimwi aayo ali peculu lya nguwo. Mpeeke kwakaba bweenka ubo. 8Lesa wakatumba musena uyo ayi, “Liculu.” Lyalo kwakaba macolesha amacuunsa, ubu bwakaba mbushiku bwabili.
9Kuswawaawo Lesa wakaamba ayi, “Maanshi ali panshi lya musena ufongomene uyo abungane mumusena womwi kwaamba ayi bulongo buyumu buboneke.” Mpeeke kwakaba bweenka ubo. 10Lesa wakatumba bulongo buyumu ubo ayi, “Inshi,” aalo maanshi akabunganishikwa pantu pomwi ayi, “Lweenge.” Mpeeke Lesa wakabona kwaamba ayi shintu ishi nshibotu. 11Kuswawaawo Lesa wakaamba ayi, “Inshi aimene shishango isho shicata nseke, ashisamu shicata shisepo shicite mikoli kweelana amushobo wa comwi acomwi.” Mpeeke kwakaba bweenka ubo. 12Aboobo inshi yakamena shishango isho shicata nseke, ashisamu shicata shisepo shicite mikoli kweelana amushobo wa comwi acomwi. Ono Lesa wakabona kwaamba ayi shintu ishi nshibotu. 13Lyalo kwakaba macolesha amacuunsa, ubu bwakaba mbushiku bwatatu.
14Kuswawaawo Lesa wakaamba ayi, “Akube mimuni mumusena ufongomene kwiculu ayi ipansaanye malumwi amashiku, alimwi akwaamba ayi shibe shitondesho sha shiindi, inshiku amyaaka. 15Mimuni iyo aibe mumusena ufongomene uyo kwaamba ayi inoomunikila cishi ca panshi.” Mpeeke kwakaba bweenka ubo. 16Lesa wakalenga mimuni inene yobilo, lisuba kwaamba ayi linokweendelesha malumwi, amweenshi ayi unokweendelesha mashiku. Alimwi wakalenga anyenyeenshi. 17Lesa wakashibamba mumusena ufongomene uyo kwaamba ayi shinoomunikila cishi ca panshi, 18mukweendelesha malumwi amashiku, alimwi akupansaanya mumuni amunshinshe. Mpeeke Lesa wakabona kwaamba ayi shintu ishi nshibotu. 19Mpeeke kwakaba macolesha alimwi amacuunsa, ubu bwakaba mbushiku bwane. 20Kuswawaawo Lesa wakaamba ayi, “Mumaanshi amube shintu shuumi shipusenepusene, alimwi abayuni bauluka mwiculu.” 21Aboobo Lesa wakalenga banyama banene ba mulweenge ashintu shoonse shuumi, alimwi sheenda isho shakafula mumaanshi kweelana amushobo wa comwi acomwi, abayuni bauluka abalo kweelana amushobo wa mbabo. Mpeeke Lesa wakabona kwaamba ayi shintu ishi nshibotu. 22Lyalo Lesa wakashipa coolwe akwaamba ayi, “Amushalane, mufule alimwi musushe maanshi a mulweenge, abalo bayuni bafule mucishi ca panshi.” 23Mpeeke kwakaba macolesha amacuunsa, ubu bwakaba mbushiku bwasanu.
24Kuswawaawo Lesa wakaamba ayi, “Painshi apabe shintu shuumi comwi acomwi kweelana amushobo wa ncico. Apabe banyama bafubwa, shilongolo shinene atuniini sheenda panshi abanyama bamuluundu, womwi awomwi kweelana amushobo wakwe.” Mpeeke kwakaba bweenka ubo. 25Lesa wakalenga banyama bamuluundu, womwi awomwi kweelana amushobo wakwe, banyama bafubwa kweelana amishobo yabo ashilongolo shinene atuniini sheenda panshi kweelana amishobo ya nshisho. Mpeeke Lesa wakabona kwaamba ayi shintu ishi nshibotu.
26Ono Lesa wakaamba ayi, “Atulenge muntu mucikoshanyo cesu, anooboneka anga ndiswe. Bakanokweendelesha nswi sha mumaanshi, bayuni bauluka, banyama bafubwa, banyama bamuluundu ashilongolo shinene atuniini sheenda panshi shoonse.”
27 Aboobo Lesa wakalenga muntu,
kumulenga mucikoshanyo cakwe mwiine.
Wakalenga musankwa amwanakashi.
28Lyalo Lesa wakabapa coolwe akubaambila ayi, “Amushalane mufule, akususha cishi ca panshi. Amweendeleshe inswi sha mumaanshi, bayuni bauluka ashilongolo shinene atuniini sheenda panshi shoonse.” 29Mpeeke Lesa wakaamba ayi, “Ndakupa shoonse shishango shicite nseke isho shili pacishi ca panshi coonse, ashisamu shoonse shicata shisepo shicite mikoli kwaamba ayi shikabe cakulya cako. 30Ono banyama boonse bamuluundu, bayuni bauluka, shilongolo shinene atuniini sheenda panshi shoonse ashimwi shoonse shiyoya, ndashipa matewu abwiisu ayi shinoolya.” Mpeeke kwakaba bweenka ubo. 31Lesa wakabona ayi shoonse nshaakalenga nshibotu abuumbi. Lyalo kwakaba macolesha amacuunsa, ubu bwakaba mbushiku bwasanu abomwi.