2 Иоан 1
1
1Ме, вичкоса юрнуӧдысь, гижа Енмӧн бӧрйӧм аньлы#1:1 Тадзи шуӧма вичко йылысь. да сылӧн челядьлы. Ті меным збыльысь мусаӧсь. Мусаӧсь абу сӧмын меным, но быдӧнлы, коді тӧдӧ збыльсӧ. 2Ті меным мусаӧсь збыльыс вӧсна, ӧд сійӧ олӧ миян пытшкын да лоӧ миянкӧд нэмъяс чӧж. 3Ті кӧ оланныд збыляс да муслунас, тіянлы лоӧ бурсетӧм, буралӧм да лӧнь олӧм Ен Батьсянь да Господь Исус Кристоссянь, Батьыслӧн Писянь.
Ӧта-мӧдӧс радейтӧм
4Меным лои зэв нимкодь, кор аддзи, мый тэнад челядь пиысь кодсюрӧ ветлӧны збыляс, Батьлӧн тшӧктӧмыс серти. 5Ӧні менам татшӧм корӧм, дона аньӧй, медым ми радейтім ӧта-мӧднымӧс. Тайӧ тшӧктӧмыс абу выль, сійӧ миян водзысяньыс нин вӧлі. 6Радейтны, сідзкӧ, овны Ен тшӧктӧмъяс серти. Дзик тайӧ тшӧктӧмсӧ ті кывлінныд водзысяньыс, сы серти и колӧ овны.
Видзчысьӧй ылӧдысьясысь
7Ӧні муюгыдас уна ылӧдысьыс. Найӧ оз эскыны, мый Исус Кристос локтіс вир-яйын. Татшӧм мортыс – ылӧдчысь да антикрист. 8Видзӧдӧй ас бӧрсяныд, медым ми эгӧ воштӧй сійӧ, мый вӧсна миян уджалӧма, но медым ми вермим босьтны удждонсӧ дзоньнас.
9Коді торкӧ Кристослысь велӧдӧмсӧ да оз кутчысь сэтчӧ, сыкӧд Енмыс абу. Коді кутчысьӧ Кристослӧн велӧдӧмас, сыкӧд Батьыс и Пиыс. 10Тіян дінӧ локтысь кӧ вайӧ мӧд велӧдӧм, энӧ сибӧдӧй сійӧс керка помад, весиг энӧ чолӧмасьӧй сыкӧд. 11Сыкӧд чолӧмасьысь ӧтувтчӧ сылӧн лёк уджъясӧ.
Бӧръя кыв
12Унатор на эм гижнысӧ тіянлы, но ӧні ог кут ставсӧ гижны кабала вылӧ чернилаӧн. Чайта, артмас волыны тіян дінӧ да воча пуксьӧмӧн сёрнитны, медым ті верминныд тырвыйӧ нимкодясьны.
13Чолӧм тэныд ыстӧны бӧрйӧм чойыдлӧн#1:13 Тадзи шуӧма мӧд вичко йылысь. челядьыс. Аминь.
Tans Gekies:
2 Иоан 1: КБ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
(c) Institute for Bible Translation, Finland, amp Finnish Bible Society, 2023