1 Koorin 11
11
1 #
1Krn. 4:16; Flp. 3:17 Kevu Krais toollu uumjunpino'moneyokwe tov nuvu Krais toollu uumjunyokwe toonyu donumjunogaulo.
Poolol mido tovi bu'duvoloso'moneyokwe pasudo tovino adoka tovinokwono
2Kevu moro yiuwi'nokai kuuguudo yodekubwasodumdo tonyuno kuudo miyallulo'gwonodupu guureji gudupola'dupudogaikikono. Toro togaikulluno tov nuvu kuudo saikuu'mwakono. Oo ilaiyo jumwakovo. 3Toro kuvi kuruv kevu aro tovino kuudo neya jouromarogaulo. Yiuwi'nokai a'mwo tooravuro mido tool Krais tookono. Aki abolo puvuro mido tool gami kwolo tookono. Aki Krais toolluro mido tool Gooti tookono. 4Toro te a'mwo pwol gami mido tovi miguto tokwe bu'duvolosowo'ji proofet yogalo'mdeyo oo subusu'nyogalo'mdeyo ado'ji tov aro tovino wuuduuwallonekono. “Oo nuvu Krais toollu dolago tomuu mamwakono.”
5Aki abolo puruv gami mido tovi laplap tokwe mabu'duvolosowo'ji proofet yogalo'mdeyo oo subusu'nyogalo'mdeyo ado'ji su tov aro tovino wuuduuwallonokwono. “Nuvu mi kwolo toollu dolago tomuu mamwakono.” Abolo puruv su toro so'ji tov gami mido toollu wogulo iwo'galonokwono. Su tov aro to'busukokwono. Abolo puruv wogulo iwo'gallo'moneyokwe gami yiuwi'nokai midoto ton me'no adovomogulopingiko to'busuko imo'nonokwono. 6Nebalokwono. Abolo puruv laplap tokwe gami mido tovi bu'duvoloso'mo mwino'ji su tov yiuwi'nokai midoto ton yiunokuudo nokwo dowopiyonokwono. Toro kuvi kuruv abolo su tov wogulo nyubwosunmiyokwe kuudo sauro'ji to'gwowi gami mido tovi neya bu'duvolosonokwono.
7-8 #
Mdk. 1:26,27, 2:18-23 Aki abolo puruv proofet yogalo jo'mo'mdeyo oo subusu'nyogalo jo'mo'mdeyo toga gami mido tovi neya bu'duvolosonokwono. Toro kuvi kuruv a'mwo pwol proofet yogalo'mdeyo oo subusu'nyogalo'mdeyo jo'mo toga'no'gwowi gami mido tovi miguto tokwe nomolloso'jo. Su tov aro tovinokwono. Gooti tool abolo tovida'ai a'mwo toollu sokwollosokalmaiyo. Toro kwol kuruv a'mwo toolluda'ai abolo tovi sokwollosokaikono. Toro te abolo tovi kwonpi toga gami kwolo tool yovo aguto maronekono. Su toro to'busuko kubalno a'mwo toollu kwonpi toga'no'gwowi Gooti tool yovo aguto ma'dowodekono. Su tov Gooti tool a'mwo toollu gavnokweyolbusuko sokwollosoka tovinokwono. 9Aki a'mwo tool abolo tovi wiyo'mwojo'moneyokwe sokwollosokalmaiyo. Toro kuvi kuruv abolo tov a'mwo toollu wiyo'mwojumwalono'moneyokwe Gooti tool abolo su tovi sokwollosokaikono. 10Toro tovino tov abolo tov proofet yogalo'mdeyo oo subusu'nyogalo'mdeyo ado'ji toga gami mido tovi neya bu'duvolosonokwono. Su toro abu'duvoloso'ji tov ensel toorai aro tovino wuuduuwallonokwono. Oo nuvu mi kwolo toollu dolago tomuu amwakono. Su toro tovino wuuduuwallonokwono.
11Toro kuvi kuruv Aguto toolluro tono'gwowi abolo kevnokwe ton a'mwo tooraida'ai go'no miyeru'mdeyomwalodupudogano. Aki a'mwo kworo kuruv abolo tonyuda'ai go'no miyeru'mdeyomwalodupudorogano. 12Su tov aro tovinokwono. Muudu'nodo toga abolo tov a'mwo toolluda'ai sumo'nokakwono. Toro kuvi kuruv lukomgu a'mwo tooro abolo tonyuro yoma'dopure tovida'ai imo'nugelabodupudorogano. Toro kuvi kuruv yiuwi'nokai su ton yiuno Gooti toolluda'ai to'no imo'nodupudogano. 13Toro te kevnokwe togaikul aro tovino neya kinodokwopiyomapinogaikikono. Abolo puruv gami mido tovi mabu'duvolosowo'ji Gooti toollu subusu'nyogalo ado'ji tov ilaiyo'mdukono? Awiyo. Su tov ilaiyo'maiyo. 14Nemoro pasudo tov aro yekubwasodowodokwono. A'mwo pwol midoto kumi'yago kurukwe sumo'no'ji tov wogulo iwo'galonekono. 15Toro kuvi kuruv abolo puruv midoto kumikokwe sumo'no'ji to'gwowi a'mwo abolo gabovo pun wonopi dupinogano. “Oo abolo su tov sugumalukokwono.” Dupinogano. Toro te Gooti tool abolo tovuro mido tovi bu'duvoloso'moneyokwe midoto kumiko tov uubweyodowodekono. 16Kevu pugaikul su toro tovino yogalo youllajunyo'mo aikulluno'ji tov nuvu aro ikudumo'mokwono. Gooti toolluro mollu'bwoto gabovo togai'aro nevuge'aro yiuwi'nokai tonol pasudo su to kuvi yodowadonogano. Aki toro tonol kuudo avalo puru'mono yau'dowadonogano.
Koorinda'ai a'mwo abolo ton Aguto toolluro wosamujuko tovi anomwallajupo toga Aguto toolluno kuudo neya miyaullajupo tovinokwono
17Aga nuvu jul'nyo puvino kuuguudo dumo'mokwono. Jul'nyo su tov arokwono. Kevu i'bwo'nyago tovi i'bwo'nodupudo toga sugudo nokwo sopujukogaikikono. Toro kugaikul kuruv kevu i'bwo'nodupudo toga kaiyako i'nodupudogaikikono. Su toro yodupudo tovino tov nuvu kemino ilaiyo milomodomorekwopiyamonyugono. 18Nuvu kemino yogalo muudu'no kuu'no tov arokwono. Kevu Jisasolluro mollu'bwoto togaikul i'bwo'nodupudo toga go'no go'no yeru'mdeyomwalodupudogaikikono. Su toro yeru'mdeyomwalodupudo tovino kuuguudo pun nuu, Nebalo'mdeyo, kuudo sau'mwakono. 19Aki aro kuudo sau'mwakono. Kemoro yeru'mdeyomwalodopure su tovida'ai nevu kuu'maiyo toru'no aro suworovekuma'mwakuuwono. Oo Gooti tool a'mwo abolo su tobuuraino ilaiyo domolloma'mwallo. Pugaikulluno yiuno kuu'maiyo toru'no su toro suworovekuma'mwakuuwono.
20Toro te kevu i'bwo'nodupudo toga Aguto toolluno kuudo yaullo'moneyokwe bret tokwe wain wonyo tokwe toval kuulonomwalodupudogaikikono. Toro kugaikul kuruv Aguto toolluno kuudo po'dogalo miyau'dupudogaikikono. 21Toro togaikul wosamujuko nomwallo'mo su'bwo'nupi toga a'mwo abolo pubuurai mwonyubusuko yopi kevnokwe togaikul wosamujuko su ton yere maropi nopiyodupudogaikikono. Toro te a'mwo abolo pubuuro mujuko'mo yodupudogano. Toro yodopure toga kevu pugaikul wain wonyo bwotonyago nodupudo tovida'ai amomo yodupudogaikikono. 22Kevu kuudo neya jaullulo. Kevu wosamujuko tokwe'aro wonyo tokwe'aro kuulonomwallo'moneyokwe ago ton kevnokwe togaikul nonagutogaikuldukono? Awiyo. Kevnokwe togaikul kurukweyogaikikono. Toro te kevu wosamujuko tokwe'aro wonyo tokwe'aro kuulonopiyodupudo tov Gooti toolluro mollu'bwoto tobuurai bwolomorumwogapiyodapudogaikikono. Aki a'mwo abolo wosamujuko tonyuno supto yodopure tobuurai kevu wogulo iwo'galodupudogaikikono. Kemoro su toro yodupudo tovino nuvu ilaiyo nokwo ilomodomorekwopiyamonyudukono? Awiyo. Kemoro su toro yodupudo tovino tov nuvu ilaiyo ku'nono milomodomorekwopiyamonyugono.
Jisasol gami uumjunyokwe toorai bret tokwe'aro wain wonyo tokwe'aro toval kwiyoka tovinokwono
(Matyuu 26:26-29; Mak 14:22-25; Luuk 22:14-20)
23Kevu neya duu'nyulo. Kuuguudo akav Aguto tool gavnokweyolluro mi anyaboka tovi kemi aikullamono. Kuuguudo su tov arokwono. Surakuuto pullugwoji Juudasol Jisasollu ikomago tooravuro ato tovi amorubweyokaikono. Toro kuvi kuruv yere mamorubweyoduke toga surakuuto avalo su tollugwoji Jisasol bret tov amarokaikono. 24Bret su tov malluno sumaiyokwe Gooti toollu, “Nenyoo,” subusu'nyogalo me'no wuudo'no toga abuudovokaikono. Toro buudeno sumaiyokwe aro kuudokaikono. “Akav moro kulako tokwono. Moro kulako tov kemi ikullo'mwojo'moneyokwe wimonyugono. Su toro tovino kevu aki aiko te kuudo yaullo'moneyokwe bret tov neya dobuudovonomwalogaulo.” Kuudokaikono. 25Toruda'ai Jisasol bret amaroka to'busuko kubalno kapwo puruv wain wonyo tokwe surosungiko tov amarokaikono. Toro malluno sumaiyokwe gami uumjunyokwe toorai aro kuudokaikono. “Kapwo akav moro mujako tovino'busuko surosungikokwono. Moro mujako bwolawono su tov Gooti toolluro subuu'yamju muuduko puruv imo'nonokwono. Toro te buro'nyo buro'nyoga'deyo toga kevu kapwo tovida'ai anpi tov moro mujako bwolawono tovino aki aiko te kuudo neya yau'mwalpinogaikikono.” Kuudokaikono.
26Su tov aro tovinokwono. Jisasol kwako akavi aki aiko te yere mwolabodowo'jure toga kevu bret tokwe wain wonyo tokwe toval nopi Aguto toolluro aboloka tovino a'mwo abolo punyu kuu'maiyo toru'no kuuno wuuduuwallumwalpinogaikikono.
Nevu Aguto toolluro wosamujuko tovi nonyo'mo toga nevnokwenolluro poowokalago tonyu neya yainyunmwalano tovinokwono
27Toro te a'mwo pwol Aguto toolluro wiyo'mwojo'moneyokwe womdo sopiyoka tovino kuudo po'dogalo miyaurowo'ji bret tokwe wain wonyo tokwe toval yasuwa'no ano'ji su tool Aguto toolluro kulako aboloka tokwe'aro mujako abwoloka tokwe'aro tovallu kaiyako mollugolamowonekono. Toro sugolamowo'ji su toollu jul'nyo nuuwollonekono. 28Toro tovino tov a'mwo pwol bret tokwe wain wonyo tokwe toval yere manodowo'jure toga sumdomgu gavnokweyol neya yainyubwo'nowo'ji lukomgu wosamujuko su toval nokwo nonekono. 29Kevu neya duu'nyulo. A'mwo pwol Aguto toolluro kulako tovino kuudo po'dogalo miyouromarowo'ji breto'mdeyo oo wain wonyo'mdeyo tov yasuwa'no ano'ji su tool Gooti toolluro kuudo wuuteyo'moneyokwe tovi ki'nomaronekono. 30Pugaikul Aguto toolluno kuudo po'dogalo miyau'dupudo togaikul bret tokwe wain wonyo tokwe toval yasuwa'no nodupudogaikikono. Su toro nodupudo tovino tov kemida'ai pubuuro wollainyo imo'nodupu aki pun nobolluwuulo ton ma'dupudogano. Aki pun yiuno'no bolodupudogano. 31Toro kuvi kuruv nevu punol Aguto toolluro wosamujuko su tovi yere manodowa'jure toga sumdomgu nevnokwe tonol nemi poowokalago tonyu po'dogalo sainyubwo'na'ji to'gwowi Aguto su tool kuudo manekuuteyonekono. 32Aki Aguto tool punollu kuudo anekuuteyo'ji kuruv nemi mollanekudo'meyo'moneyokweyokwono. Su tov lukomgu kwako akavida'ai a'mwo abolo ton Gooti toolluro kirumwallo tovi ma'dopure toga nekunollu kuruv kuudo nonekuuteyo'jokwe tovinokwono.
33Toro te mi avalobuuravoo, kevu Aguto toolluro wosamujuko nonyo'mo su'bwo'nupi toga kemida'ai a'mwo abolo pubuurai mwonyubusuko nyupiyo. Toro kuvi kuruv yiuwi'nokai togaikul avalo toga nonyo'moneyokwe imgu amgu sogwollo neya duuwinogaulo. 34Aki su toro toga pugaikul mujuko bwotonyo aikulluno'ji tov yere mi'bwo'nodopure toga kemi ago tomuuno plavopi wosamujuko pun neya nupinogaikikono. Su tov kemoro i'bwo'nyo tovi kaiyako sugolamopi tov Aguto tool kuudo nekuuteyo'jokwe tovinokwono.
Aki kemi yekubwaso'mo kuuguudo pugai'aro kuuno kwoso. Toro te nuvu abekuru'ma'mi toga kuuguudo su ton nekudumonyugono.
Tans Gekies:
1 Koorin 11: SMB
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2022: Ethnos360 Sanford, Florida