Mateo 2
2
Qoylar estudiaqkuna Jesústa adorananpaq chayashqan
1Herodes rey kashqan witsanmi Judea provinciacho kaykaq Belén markacho Jesús yurirqan. Yuriykuptinmi qoylar estudiaq runakuna inti jeqamunan kaq lädupita Jerusalénman chayaykur 2tapukurqan kayno nir: <<¿Maychötaq Israel runakunapa mandaqnin rey kananpaq yuriq iti kaykan? Qoylarnin jeqamuqta rikarmi payta adoraq shapäkamushqä>>.
3Tsayta mayaykurmi rey Herodes y Jerusaléncho taq runakunapis pasaypa mantsakar yarpachakurqan. 4Tsaymi mandaq cürakunata y ley yachatsiqkunata qayaykatsir Herodes tapurqan kayno nir: <<Salvamaqnintsi Cristo ¿maycho yurinanpaqtaq kaykan?>>
5Tsayno tapuptinmi kayno nipäkurqan: <<Judea provinciacho kaykaq Belén markachömi, tayta. Tsaycho yurinanpaqmi Tayta Diospa profëtan kayno qelqarqan:
6<< <Belén marka, Judácho kaq wakin markakunapita mas takshala kaptikipis
qamchömi Israel runakunapa mandaqnin rey yurinqa.#Miq. 5.2.
Paymi Israel runakunata uysha mitsiqno ali rikanqa> >>.
7Tsayta mayaykurmi Herodes pakaylapa qayatsirqan qoylar estudiaqkunata. Chayaykuptinmi tapurqan tsay qoylarta imaypitana rikashqantapis. 8Wilaptinmi Herodes kayno nirqan: <<Belénman aywapäkuy tsay wamrata ashipäkamunaykipaq. Tariykurqa wilapäkamanki noqapis adoraq aywanäpaq>>.
9Belénman aywaykaptinmi tsay rikashqan qoylarpis paykunapa puntanta aywarqan. Wamra kaykashqan kaq wayi derëchunman chayaykurnami qoylar ichikuykurqan. 10Tsayta rikarmi fiyupa kushikärirqan. 11Wayiman yaykushpanmi wamrata y maman Maríata taripäkurqan. Tsaymi wamrapa nawpanman qonqurpakuykur adorapäkurqan. Nirkurnami apashqan qorita, inciensuta y mïrrata qarapäkurqan#2.11 Wakin runakunaqa regalapäkurqan nipäkun..
12Herodes kaqman manana kutinanpaq Tayta Dios sueñuynincho revelaptinmi juk nänipana markanman kutikärirqan.
Egiptuman Jesústa José qeshpitsishqan
13Qoylar estudiaqkuna aywakuptinnami Joséta sueñuynincho Tayta Diospa angilnin kayno nirqan: <<Herodesmi wamrata wanutsinanpaq ashitsinqa. Tsawraqa kanan höra sharkur wamrata mamantinta Egiptuman qeshpitsiy. Tsaycho tämunki yapay wilanäyaq>>.
14Tsawraqa jinan höra rikcharkamur patsa manaraq waraptin wamrata mamantinta apakurkur Egiptuman aywakärirqan. 15Tsaychömi täpäkamurqan Herodes wanushqanyaq. Tsaynöpami Tayta Diospa profëtan kayno qelqashqanta cumplirqan: <<Tsurï kaptinmi Egiptupita qayamurqä>>.#Ose. 11.1.
Beléncho wamrakunata wanutsishqan
16Qoylar estudiaqkuna wilananpaq mana kutiykuptinmi rey Herodes pasaypa rabyakurqan. Tsawraqa soldädunkunata kacharqan Belén markacho y nawpan estanciakunachöpis olqu wamrakunata wanutsinanpaq. Qoylarta imay rikashqantapis wilapashqanpita cuentata jorqurirmi wamrakunata wanutsipäkurqan tsayraq yurishqapita ishkay watayuqyaq. 17Tsayno wanutsirmi profëta Jeremías kayno qelqashqanta cumplipäkurqan:
18<<Ramá markacho lakikur ataypa atar waqashqanmi mayakaykämun.
Tsayqa Raquel waqashqanmi kaykan.
Wawankuna wanushqanpitami shoqaptinpis mana chawaypa waqaykan>>.#Jer. 31.15.
Egiptupita kutimushqan
19Herodes wanuykuptinnami Egiptucho José kaykaptin Tayta Diospa angilnin sueñuynincho 20kayno nirqan: <<Wamrata mamantinta apakurkur Israelpa kutikäriy. Wamrata wanutsiyta munaqkuna wanushqanami>>.
21Tsayno niptinmi wamrata mamantinta apakurkur Israelman kutikurqan. 22Kutiykashqanchömi José musyarqan Judeacho rey Herodespa trukan tsurin Arquelao mandaq kaykashqanta. Tsayta musyaykurmi Judeaman kutiyta mantsakurqan. Tsawraqa sueñuynincho Tayta Dios wilaptin Galileamanna aywakurqan. 23Tsaynöpami Nazaret markaman taq aywakärirqan.#Mar. 1.24; Luc. 2.39; Juan 1.45. Tsaycho tarmi Tayta Diospa profëtankuna kayno nishqanta cumplipäkurqan: <<Nazareno kashqantami runakuna nipäkunqa>>.
Tans Gekies:
Mateo 2: qvmB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2003, Wycliffe Bible Translators, Inc. All rights reserved.