Ọdọvịdị 21
21
Anisirẹrị ẹ sị anẹẹ yị anọrụ Anịbẹnjamịnị
1Anisirẹrị nịnị ẹ raà hị́ eku Imizipa ka ẹ yị nyị ọza ọnyọọnyị ẹnịnị ana va sị ozi anị ọnẹẹ ga aza Ịbẹnjamịnị nịnị. 2Ịrẹma ọnị ịrẹkụ sị ji kwooze dị Anisirẹrị nịnị nọ Ịbẹtẹrị dị ẹ yaatẹ ọvịdị Ohomorihi na ngụ oruva dị ẹ jị òrèrè ngụ-ngụ-ngụ nị. 3Ẹ na owu tụ ẹba dị ẹ ka Ohomorihi Anisirẹrị sị ẹ vẹ dị ẹngụ ọsọnị ve tu Anisirẹrị? Sị ẹ vẹ dị ịrẹsụ ọnya sị vú ẹtẹ hụrẹ ịnị Isirẹrị ajịnị? 4Ịnị ẹnẹnẹ eyinẹhẹ anị dị Anisirẹrị kwẹẹtẹ dị ẹ hi ụta ọyị rị ịsa ịsọvọ ịra nị, dị ẹ mẹ̀ ịsọvọ ọnị ẹ rịra saaka-saaka hi Ohomorihi nị. 5Ịrẹma ịsọvọ ọnọọ dị Anisirẹrị nịnị họ̀ use ka â nyị ịpa ịnị ịrẹsụ Anisirẹrị ẹnẹ yị yịị ịnị aza ana kụ ẹngụ gụ ọvịdị Ẹnẹyịmavara? Ọ ka ẹnịnị ẹ vịdị ra sị mẹ eku hị́ ka ọza tụra ọza ana ahịka ọ yị vẹ ịnị ọkwẹngụgụ aza Ẹnẹyịmavara ịnị ẹtẹ Imizipa ọza ọnọọ venee su. 6Ịnị ụmẹ ọnọọ ịrẹyị aza Ịbẹnjamịnị ọ zị Anisirẹrị ẹngụ ẹtẹẹtẹrẹ, dị ẹ ka, ịnị ajịnị, ọnyara ịnị ẹnị ịrẹsụ ẹwụrẹva ọ sị vu hi ẹtẹ. 7Anisirẹrị ee họ̀ use ka sị ẹnị zụ mẹ dị ẹnị ẹ zụ re Anẹẹ yị aza Ịbẹnjamịnị chee ana vọ? Ệ tamayị ka ẹnị ẹ ra sị ịrẹha Ẹnẹyịmavara hị́ eku ka ẹnị ẹyị va sị ozi ọnẹẹ ẹnịnị ga Anịbẹnjamịnị. 8Ịjọnọọ dị e họ̀ use ka yere ịrẹsụ ọnị ọvị ịnị Isirẹrị ẹnẹ yị vẹ ịnị ọkwẹngụgụ ẹnẹ nị nyị ịnị irehi Ẹnẹyịmavara ẹkụra Imizipa? Dị ẹnịnị ne tu ka ẹ yị nyị ọzọnyọọnyị ana hụrẹ Ijabesi Igiriyadi vẹ ịnị ịragụ ọnọọ nị. 9Ka ịjị a hi ịrẹha aza ẹ yị nyị ọza ana hụrẹ ẹkụra Ijabesi Igiriyadi vẹ. 10Ọsọnị dị ịragụ ọnọọ tụ isoja nini akahị oze ẹwụrẹva ka ẹ nọ Ijabesi Igiriyadi dị ẹ na wụ̀ avaba aza ene hi ịzọọ ne beri anẹẹ ọnịrị ezweyi. 11Dị ọ rẹ ka yị wa ka e re ka ẹnị ẹ wụ̀ avaba anẹẹ ana ra yẹ ọnọrụ. 12Ịjị isoja nini ẹnẹẹ tu Ijabesi-Igiriyadi ẹnịnị e re ezi anẹẹ akava ẹnẹẹ yị yẹ ọnọrụ. Dị ẹ kụ ozwoorihi ẹnẹẹ vẹ ịzị ẹ kụ udi tụ ẹkụra Isiro ana yị nị ẹtẹ Ikanaani nị. 13Ịjọnọọ dị ịragụ Anisirẹrị tụ hi anọrụ Ịbẹnjamịnị chee ana vọ hi ịnị ịda Irimoni ka ene pe wa ka ịrẹyị uzee ka ịrazị ọọ taa. 14Ịzẹyịza ịhị ọnọọ Anịbẹnjamịnị varẹma nọ aha ẹnẹ ra nị. Ịjọnọọ dị Anisirẹrị nịnị kụ ozwoorihi Anijabesi Anigiriyadi ọnị ẹnịnị ẹ yị wu yịị Anịbẹnjamịnị nị ama ozwoorihi ẹnẹẹ ẹ yị gụ avaba ẹnịnị. 15Anisirẹrị nịnị ẹ zị ẹngụ ẹtẹẹtẹrẹ yị Anịbẹnjamịnị agụvị ka Ẹnẹyịmavara ọ ra mẹ ka a nyị ẹgahi ịnị akakana Anisirẹrị ẹnịrị Anịbẹnjamịnị. 16Ịjọnọọ dị ọdọvịdị Anisirẹrị ka ẹ yịị mẹ kụkụ nyị ọnyẹnẹẹ ana vọrọ ka Anịbẹnjamịnị ẹ nyị aanị ịzị ẹnị e ne re anẹẹ va yị aza ana vọ dị ẹ nyị wa? 17Dị ẹ rẹ ka â nyị ka a nyị ezi ana vaa vịị ọdọmịrẹsụ yị evere Ịbẹnjamịnị; agụvị dị asị ịpa ẹnịnị vú ẹtẹ ịnị avaba ịrẹsụ Anisirẹrị. 18Dị ẹ ka, ẹnẹ yẹ ka ẹnẹ yị zụ sị ezi anẹẹ ẹnịnị yị Anịbẹnjamịnị ka ẹ nyị wa agụvị ka ẹnị ẹ ra hị́ eku ka ọza anaa vavọọ mẹ ọ yị vee zoza yị ọ. 19Ịjọnọọ dị e sị iwọjị vẹ ka a nyị eche Ẹnẹyịmavara anaa rị ịrayị-ịrayị enee ve tu Isiro eyi akẹba Ịbẹtẹrị, eyi ọnị ọyị azị hụrẹ akaha oze ọbanyị ọbanyị ẹkụra ana hụrị Ịbẹtẹrị hịrẹ na ngụ Ịsẹkẹmị, dị ọ ya akẹtẹ Irebona nị. 20Dị ẹ ka yị Anịbẹnjamịnị ka ẹ nọ ịnị ụbazị ịvayịnị, dị ẹ na tẹ dị ẹ sị eyi pe ẹtẹ. 21Dị ee zi ịjị ezi anẹẹ Anisiro aa vaa ngụ ohu na nyị ẹzẹ. Ịjị ẹ vavọọ re wa kẹnẹ, dị ẹ na za wa ụkata-ụkata. Ozwoorihi tụra ozwoorihi ọnị ọza ọnyọọnyị ọ vavọọ za dị ọ sị ọ na mẹ ose anị, dị ọ sị ọ nọ ịnị ẹtẹ Ịbẹnjamịnị. 22Ịjị ada ẹnịnị ọnịrị ẹnẹbẹnị ẹnịnị ẹ sị ọyịkụ va họ̀ ẹnị use ka sị ẹ vẹ, ẹnị vaa kà a yị wa ka ẹ mẹ ayamva yị ẹnị dị ẹ sị mẹ ọgụvọ yị Anịbẹnjamịnị agụvị ka ọza ẹ yị re ọnẹẹ yị wa nyị ịnị ụmẹ ịrẹkụ. Wẹ yị rị ịvị nịnị agụvị ka e yị vị ẹwụ nịnị ọ sị ozi ewu nịnị ga wa. 23Ịzẹyịza avọ Anịbẹnjamịnị nịnị mẹ mẹ nị. Ịjị ezi anẹẹ ẹnẹ a nyị ẹzẹ dị ezi anọrụ ẹnẹ na dị ọzọza za ose anị dị ẹ sị ọ ne hu nị. Ịjọnọọ dị Anịbẹnjamịnị va na ẹkụra ẹnịnị dị e ne tenyi ọ dà nị, dị ẹ ra ịzọọ nị. 24Ịnị ụmẹ ọnọọ Anisirẹrị nịnị ẹ hụrẹ ẹkụra ọnọọ nọ eehi dị ọzọza nọ ịpa ịrẹsụ ọnịrị abara anị nị. 25#Ọdọ 17.6Ịnị ụmẹ avọọ ẹyị nyị ohinọyị ịnị ẹtẹ Isirẹrị; dị avaba aza aa mẹ̀ ịsa ene zee wa eyi kẹnẹ nị.
Tans Gekies:
Ọdọvịdị 21: EBTP
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Ebira First Bible © Bible Society of Nigeria, 2014.