Luglaa 1
VAGBI
1
Kummaa luglaa wia
1Lugli la, Kɔraawiizi faa ta chiŋ ni hɛri maanii.#Jɔɔn 1:1 2Hɛri faa waa duula dɔɔwɛ, di chɔɔ woo. Bɔbiri tintintiŋ, faa tɔ a nii ni. Kɔraawiizi Duma faa guali u ni, di ra bar.
3Denii Kɔraawiizi ŋɔ, “Gil bɔr chaani!”#2Kɔr 4:6 Awia, bɔr chaani. 4U binni bɔchaaŋ la, di u wesso. U bargi bɔchaaŋ la lii bɔbiri la ni, 5di ra yir bɔchaaŋ la hɔpizaa, di ra yir bɔbiri la ge hamuŋa. Bɔr duani, hɔpizi chɔɔzi, di ɛɛ a lugli hɔpizii.
6Denii Kɔraawiizi kaa ŋɔ, “Gil chiŋ bargi a niiri.” 7U gil chiŋ bargi a niiri, aŋhina du u zɛɛ, aŋhina ge du u chiŋ. Guŋ kaa ɛɛ. 8U ra yir kunla n du a baambaaŋ la, chiŋ. Bɔr kaa duani, hɔɔ kaa pizi. A hɔpizaa anɛɛ hinnɛ guŋ.
9Kɔraawiizi kaa ŋɔ, “Gil niiri la n du a chiŋ zɛɛ la chaali chɔɔ bɔkpaŋ, ka bɔ́hilii lii.” Guŋ himmaa kaa ɛɛ. 10U ra yir bɔhilii la hɛri, di kaa ra yir a niiri la n chaali bɔkpaŋ la ge muuzenaa. Kɔraawiizi kaa naa di a wesso.
11Kɔraawiizi ŋɔ, “Gil a hɛri lii kooree ni daazi irizi maa. Anla n na du bee ani anla n na nɔŋ di ra du bee a biine maa.” Guŋ himmaa ge kaa ɛɛ. 12Hɛri lii kooree ni daazi irizi maa. Anla n na du bee ni daazi la n na nɔŋ di ra du bee. Kɔraawiizi binni, di a wesso. 13Bɔr duani, hɔɔ kaa pizi. Hɔpizaa ahoro hinnɛ guŋ.
14Kɔraawiizi kaa ŋɔ, “Gil nine du chiŋ, di bargi hɔpizaa ni hamuŋa. Aabuu ninna bagli saŋazi ni hɔpizaa ani binni, 15di gil a du chiŋ, di ra chaani hɛri. Guŋ kaa ɛɛ.” 16Denii Kɔraawiizi ta ninzenaa anɛɛ, zeŋhiŋ a chaani hɔpizaa, jigahiŋ ge ra chaani hamuŋa. U kaa ta chinchiŋwilaa ge jaa. 17U gillɔɔ a maa du chiŋ di ra chaani hɛri, 18di ra bagli hɔpizaa ni bɔr biraa, di kaa bargi bɔchaaŋ ni bɔbiri la ge dɔŋa ni. Kɔraawiizi binnaa, di a wesso. 19Bɔr duani, hɔɔ kaa pizi. A hɔpizaa anaazu hinnɛ guŋ.
20Kɔraawiizi kaa ŋɔ, “Gil kunnyinee lii su a nii biini, zumbizi ge ni a dizi su chiŋ, di zaah ra bar.” 21U kaa ta muuzeŋ sechɔgaa ni kunnyinee, a su a nii biini. Zumbizi ge ni a dizi maa lii di su chiŋ, di zaah ra bar hɛri maa. Kɔraawiizi binni a ge, di a wesso. 22Denii u kissi a maa, di ŋɔ, “Ií ra lul di wazi, di su niiri la biine, zumbizi la ge lul su hɛri la maa.” 23Bɔr kaa duani, hɔɔ kaa pizi. A hɔpizaa anue hinnɛ guŋ.
24Denii Kɔraawiizi kaa ŋɔ, “Gil kunnyinee maa ni a dizi lii su hɛri, kundɛɛzaa, kuntuuzaa ani pir sela ni a dizi maa.” Guŋ kaa ɛɛ. 25U ta pir sela ni a dizi, kundɛɛzaa ni a dizi, kuntuuzaa maa ni a dizi. Denii u binnaa, di a wesso.
26Denii Kɔraawiizi ŋɔ, “Ií gil ya ma newea bá du lugɔ yaa, di du yaa duula, bá dɔɔ fɔŋŋa muuzeŋ nyinni, zumbizi, kundɛɛzaa, pir sela ani kuntuuzaa maa ni.”
27Awia, u ta newea, ba liu.
U ta baabuu ba du
u himmaa duula,
di ɛɛ baal ni haaŋ.#Lug 2:21-24
28Kɔraawiizi kissi baa di ŋɔ, “Ií lul su a hɛri maa, di ra binni u ni. Ii daŋ dɔɔ fɔŋŋa, nyinni, zumbizi ani kunnyinee irizi maa ni.”
29Kɔraawiizi ŋɔ, “Ií na, n tɛɛ iabuu kuna irizi la maa n na du bee ani daazi la n na nɔŋ di ra du bee, ií ra di. 30N kaa tɛɛ pir sela, zumbizi, kuntuuzaa ani kunnyinee maa paŋhoori ni kooree, á ra di.” A guŋ ge ɛɛ.
31Denii u jaa binni kuna la maa un tawɛɛ la, di a wesso werge maa, u bɔra sɔɔni. Bɔr kaa duani, hɔɔ kaa pizi. A hɔpizaa anumbɛl hinnɛ guŋ.

© Copyright Ghana Institute of Linguistics, Literacy and Bible Translation

In co-operation with Wycliffe Bible Translators, Inc.

Vind meer uit oorKƆRAAWIIZI HƆŊ Vagla