Génesis 1
1
Tachi Akꞌõrepa na pꞌekꞌau eujã mãikꞌaapa pajã ooda
1Naapɨara Tachi Akꞌõrepa pajã mãikꞌaapa eujã ookꞌãri, 2jõma pꞌãriu baji. Pania aupai ũu baji. Waa ne–inaa wẽ–e paji. Iru Jaure pania ɨ̃rɨ nipapachi. Tachi Akꞌõrepa na pꞌekꞌau eujã mãikꞌaapa pajã nãgá ooji.
3Tachi Akꞌõrepa jaraji:
—Ɨ̃daapáde aji.
Mãpai ɨ̃daaji.
4Ɨ̃daakꞌãri, Tachi Akꞌõrepa mãgaji:
—Pia bɨda aji.
Mãpai ma ɨ̃daa pꞌãriudeepa awara bɨji. 5Ma ɨ̃daa tꞌɨ̃ bɨji ewari mãikꞌaapa pꞌãriu tꞌɨ̃ bɨji pꞌãrikꞌua. Mãgá ooji ewari, pꞌãriu ome, kꞌãima abaade.
6Mãpai Tachi Akꞌõrepa jaraji:
—Pania ũkꞌuru ɨtꞌaa wãpáde aji.
7Mãga paji. Tachi Akꞌõrepa ewaraa kꞌobɨji pania ũkꞌuru aɨ edaikꞌa eere beemerã; ũkꞌuru aɨ ɨtꞌaikꞌa eere beemerã. 8Ma ewaraa kꞌobɨmaa tꞌɨ̃ bɨji pajã. Ma jõma kꞌãima omeede ooji.
9Mãpai Tachi Akꞌõrepa jaraji:
—Pania pajã ekꞌari bɨ ãyaa beepáde aji, eujã uchiamerã.
Mãga paji. 10Chi pꞌoo bɨmaa tꞌɨ̃ bɨji eujã; paniamaa tꞌɨ̃ bɨji pꞌusa. Tachi Akꞌõrepa ichia ooda pia unuji. 11Mãpai irua jaraji eujãde ne–inaa kꞌarra kꞌĩra tꞌãdoo tꞌonomerã; pꞌũajara kꞌĩra tꞌãdoo chi tau tꞌonomerã mãikꞌaapa pakꞌuru kꞌĩra tꞌãdoode nejõ chaumerã. Irua jaradakꞌa mãga paji. 12Eujãde uchiaji ne–inaa kꞌarra kꞌĩra tꞌãdoo, pꞌũajara chi tau tꞌonopari mãikꞌaapa pakꞌuru nejõ chaupari.
Ma jõma oopꞌeda, Tachi Akꞌõrepa mãgaji:
—Pia bɨda aji.
13Ma jõma kꞌãima õpeede ooji.
14Mãpai Tachi Akꞌõrepa jaraji:
—Pajãde paraapáde aji, ne–inaa ɨ̃daapari ma kꞌaurepa eperãarãpa kꞌawadamerã ãstaawa, pꞌãrikꞌua, año, atane mãikꞌaapa fiesta ewari. 15Ma pajãde ne–inaa ɨ̃daapari kꞌaurepa na eujã ɨ̃daa bapari.
Mãga paji. 16Tachi Akꞌõrepa ne–inaa omé ooji pajãde bɨitꞌee. Chi waibɨara bɨ ooji ãstaawa ɨ̃daamerã. Jõdee chi ma–ãriara bɨ ooji pꞌãrikꞌua ɨ̃daamerã. Ichiaba ooji lucero pꞌãrikꞌua ɨ̃daadamerã. 17Tachi Akꞌõrepa ma ne–inaa ɨ̃daapari bɨji pajãde eujã ɨ̃rɨ ɨ̃daamerã 18mãikꞌaapa ãstaawa, pꞌãriu ome awara beemerã. Mapa ãstaawa akꞌõrejĩru jẽrapari mãikꞌaapa pꞌãrikꞌua atane ɨ̃daapari.
Mãga oo aupakꞌãri, mãgaji:
—Pia bɨda aji.
19Ma jõma kꞌãima kꞌĩmariide ooji.
20Mãpai Tachi Akꞌõrepa jaraji:
—Toida paraapáde aji, chikꞌo kꞌĩra tꞌãdoo.
Ichiaba jaraji:
—Paraapáde aji, ipanaarã eujã ɨ̃rɨ wãabaidamerã. Mãpai paraaji. 21Tachi Akꞌõrepa pꞌusadepema ne–inaa jõmaweda chokꞌai bee ooji, nemĩsia paara. Ichiaba ooji toidapema ne–inaa jõmaweda chokꞌai bee mãikꞌaapa ne–inaa jõmaweda chokꞌai bee eujã ɨ̃rɨ wãabaipata.
22Ichia ooda pia beekꞌãri, Tachi Akꞌõrepa na pedee pia jaraji ma toidapema ne–inaa chokꞌai beerãmaa:
—Warrarã chokꞌara oodapáde aji.
Aukꞌa jaraji ipanaarãmaa:
—Ipana chakꞌeerã chokꞌara oodapáde aji.
23Ma jõma kꞌãima joisomaade ooji.
24Mãpai Tachi Akꞌõrepa jaraji:
—Eujãde paraapáde aji, ne–animalaarã kꞌĩra tꞌãdoo; taunomaa, tausaaree mãikꞌaapa eujãde bipa urtꞌĩu nĩuteepata paara.
Mãga paji. 25Tachi Akꞌõrepa ma ne–animalaarã ooji mãikꞌaapa ichia ooda pia akꞌɨji.
26Mãpai Tachi Akꞌõrepa mãgaji:
—Ɨ̃rá oodáma aji, eperã tachikꞌa bamerã. Eperãarãpa ãchi jua ekꞌari iru pꞌanadaitꞌee nãgee ne–animalaarã kꞌĩra tꞌãdoo: chikꞌo; ipanaarã; ne–animalaarã taunomaa, tausaaree bee paara; ne–animalaarã eujãde bipa urtꞌĩu nĩuteepata.
27Tachi Akꞌõrepa eperã ichikꞌa ooji; ɨmɨkꞌĩra, wẽra ome. 28Tachi Akꞌõrepa ma eperãarã pia akꞌɨji. Mapa na pedee pia jaraji:
—Warrarã chokꞌara oodapáde aji, mãikꞌaapa parã jua ekꞌari iru pꞌanadapáde aji, na eujã, chikꞌo, ipanaarã mãikꞌaapa ne–animalaarã, chi bipa urtꞌĩu nĩuteepata paara.
29Tꞌẽepai mãgaji:
—Parã–itꞌee oojida aji, ne–inaa kꞌarra kꞌĩra tꞌãdoo, chi tau tꞌonopari ome, mãikꞌaapa pakꞌuru chi nejõ chaupari ome. Ma jõmaadepema ne–inaa chauru parãpa kꞌodaitꞌeeda aji. 30Ma awara ne–animalaarã, chi tausaaree beerãpa, chi bipa urtꞌĩu nĩuteepataarãpa mãikꞌaapa ipanaarãpa paara kꞌodaitꞌeeda aji, ne–inaa kꞌiru, pꞌũajara kꞌĩra tꞌãdoo.
Mãga paji.
31Tachi Akꞌõrepa jõma ichia ooda akꞌɨkꞌãri, mãgaji:
—Pia bɨda aji.
Ma jõma kꞌãima seide ooji.
Tans Gekies:
Génesis 1: sjaB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
©2005, 2010, 2015 Wycliffe Bible Translators, Inc. All rights reserved.